റിയാദ്​: സൗദി അറേബ്യയിൽ കഴിഞ്ഞ ഞായറാഴ്ച പ്രഖ്യാപിച്ച പൊതുമാപ്പ്​ പരമാവധി ഉപയോഗപ്പെടുത്തുന്നതിന്​ ഇന്ത്യൻ എംബസി ഒരുങ്ങി. നഗരങ്ങളിൽ നിന്ന് അകന്ന് മസ്റ (കൃഷിയിടം) യിലും മറ്റും കഴിയുന്ന നിയമ ലംഘകരെ കണ്ടെത്തി അവസരം വിനിയോഗിക്കാൻ പ്രേരണ നൽകുന്നതിനും മറ്റ് പ്രചാരണ ദൗത്യങ്ങളിലും മാധ്യമങ്ങളും സാമൂഹ്യ പ്രവർത്തകരും പങ്കാളികളാവണമെന്ന് അംബാസഡർ അഹമ്മദ് ജാവേദ് പറഞ്ഞു. വ്യാഴാഴ്​ച വൈകീട്ട്​ എംബസി ഓഡിറ്റോറിയത്തിൽ നടന്ന ഇന്ത്യൻ വോളന്റിയർമാരുടെ യോഗത്തിൽ സംസാരിക്കുകയായിരുന്നു അദ്ദേഹം.

ആദ്യ ഘട്ടമായി റിയാദ്​, ദമാം, ജുബൈൽ, ബുറൈദ, വാദി ദവാസിർ എന്നീ നഗരങ്ങളിൽ എംബസി സഹായ കേന്ദ്രങ്ങൾ ആരംഭിക്കുമെന്നും അദ്ദേഹം കൂട്ടിച്ചേർത്തു. തുടർന്ന് കൂടുതൽ പട്ടണങ്ങളിൽ കേന്ദ്രങ്ങൾ തുറക്കുന്നതിനുള്ള സാധ്യതകൾ ആരായും. പാസ്​പോർട്ട്​ അടക്കം ഒരു രേഖയും കൈയ്യിലില്ലാത്ത നിയമലംഘകർ നേരിട്ട്​ ഈ കേന്ദ്രങ്ങളെയോ എംബസിയെയോ സമീപിക്കണം. ഇതിനായി ഇടനിലക്കാരുടെ സഹായം തേടരുത്​. ഒരാൾക്കും പണം നൽകരുത്​. പാസ്​പോർട്ടില്ലാത്തവർക്ക്​ ഔട്ട്​പാസ്​ നൽകും. ഔട്ട്പാസിന്റെ ഫീസ്​ ഒഴിവാക്കാൻ കേന്ദ്രസർക്കാരിനോട്​ അഭ്യർഥിക്കും. ഒരിക്കൽ ഔട്ട്പാസ്​ കിട്ടിയാൽ കാലാവധി കഴിയുന്നവരെ കാത്തുനിൽക്കരുത്​. വീണ്ടും പുതുക്കി നൽകുമെന്ന്​ പ്രതീക്ഷിക്കരുത്​. ഔട്ട്​പാസ്​ കിട്ടിയാൽ ആദ്യ അവസരത്തിൽ തന്നെ എക്​സിറ്റ്​ നേടി നാടുപിടിക്കാൻ നോക്കണം. ഉംറ, ഹജ്​, ട്രാൻസിറ്റ്​, സന്ദർശന വീസകളുടെ കാലാവധി കഴിഞ്ഞ്​ തങ്ങുന്നവർക്ക്​ സാധുവായ പാസ്​പോർട്ട്​ കൈവശമുണ്ടെങ്കിൽ വിമാനത്താവളം, തുറമുഖം, കരമാർഗം തുടങ്ങിയ രാജ്യ കവാടങ്ങളിലെ എമിഗ്രേഷൻ കേ​​​​ന്ദ്രങ്ങളിൽ നിന്ന്​​ എക്​സിറ്റ്​ നേടി സ്വദേശങ്ങളിലേക്ക്​ മടങ്ങാം. എന്നാൽ തൊഴിൽ വീസയുടെ​ കാലാവധി കഴിഞ്ഞും ഹുറൂബ്​ കേസിൽ കുടുങ്ങിയും അനധികൃതരായി കഴിയുന്നവർക്ക്​ സാധുവായ പാസ്​പോർട്ടുണ്ടെങ്കിൽ ജവാസാത്തിൽ നിന്നാണ്​ എക്​സിറ്റ്​ ലഭിക്കുക.
saudi arabia, amnesty, indian embassy

ഇതിനായി ഓൺലൈനിൽ റജിസ്​റ്റർ ചെയ്യണം. ഇത്​ സംബന്ധിച്ച വിവരങ്ങൾ പിന്നീട്​ എല്ലാവരെയും അറിയിക്കും. ഇവർക്കെല്ലാം യാത്രാക്കൂലി അല്ലാതെ മറ്റൊരു പണചെലവുമുണ്ടാകില്ല. സൗദി അധികൃതർ ജവാസാത്തുമായി ബന്ധപ്പെട്ട എല്ലാ സാമ്പത്തിക പിഴകളും ഫീസുകളും ഒഴിവാക്കിയാണ്​ പൊതുമാപ്പ്​ പ്രഖ്യാപിച്ചിരിക്കുന്നത്​​. എന്നാൽ ട്രാഫിക്​ ഉൾപ്പെടെ എന്തെങ്കിലും പിഴകൾ ഇഖാമ നമ്പറിൽ ഉണ്ടെങ്കിൽ അത് അടക്കേണ്ടി വരും. പൊലീസ്​ കേസുള്ളവർക്ക്​ പൊതുമാപ്പിന്റെ ആനുകൂല്യം ലഭിക്കില്ല. ‘മത്​ലൂബ്​’ വിഭാഗത്തിൽ പെട്ടവർക്ക്​ കേസ്​ നടപടികൾ അവസാനിച്ചെന്ന പൊലീസ് രേഖ കിട്ടിയാലേ നാട്ടിലേക്ക്​ മടങ്ങാൻ കഴിയൂ. ഹുറൂബായവരുടെ പാസ്​പോർട്ടുകൾ എംബസിയിൽ എത്തിയിട്ടുണ്ടോ എന്ന്​ പരിശോധിക്കണം. നിലവിൽ 4000ത്തോളം പാസ്​പോർട്ടുകൾ എംബസിയിലുണ്ട്​. ഈ പാസ്​പോർട്ടുകളെ കുറിച്ചുള്ള വിവരങ്ങൾ എംബസി വെബ്​സൈറ്റ്​ വഴി പുറത്തുവിടും. എന്നാൽ ഔട്ട്​പാസ്​, എക്​സിറ്റ്​ പോലുള്ളവ വിഷയങ്ങളിൽ ഇടനിലക്കാരാകരുത്​. മുമ്പ്​ നിതാഖാത്ത്​ ഇളവുകാലത്തുണ്ടായ ദുരുപയോഗ ശ്രമങ്ങളെ ഓർമിപ്പിച്ചാണ്​ ആരും ഇടനിലക്കാരാകാൻ ശ്രമിക്കരുതെന്ന്​ അംബാസഡർ താക്കീത്​ ചെയ്​തത്​.

വിവിധ ഭാഗങ്ങളിൽ നിന്നെത്തിയ 200ലേറെ സാമൂഹിക പ്രവർത്തകർ യോഗത്തിൽ പ​ങ്കെടുത്തു. ഇവരുടെ അഭിപ്രായങ്ങളും നിർദേശങ്ങളും കേട്ട ശേഷമാണ്​ അംബാസഡർ സംസാരിച്ചത്​. മലയാളി സമൂഹത്തി​ന്റെ പ്രതിനിധികളായി ശിഹാബ്​ കൊട്ടുകാട്​, ബാലച​ന്ദ്രൻ തുടങ്ങിയവർ സംസാരിച്ചു. ഡപ്യൂട്ടി ചീഫ്​ ഓഫ്​ മിഷൻ ഹേമന്ത്​ കൊട്ടൽവാറും സംസാരിച്ചു. കമ്യൂണിറ്റി വിങ്​ കൗൺസലർ അനിൽ നോട്ട്യാൽ, കോൺസുലാർ കൗൺസലർ ഷീൽ ഭ​ദ്ര എന്നിവർ പങ്കെടുത്തു. നിലവിലെ പാസ്​പോർട്ട്​ സേവാകേന്ദ്രങ്ങളിലാകും എംബസി സഹായകേന്ദ്രങ്ങൾ തുറക്കുക എന്നാണ്​ ഔദ്യോഗിക വൃത്തങ്ങളിൽ നിന്ന്​ ലഭിച്ച സൂചന.

വാർത്ത: നൗഫൽ പാലക്കാടൻ

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ