ന്യൂഡൽഹി: മധ്യപ്രദേശ് വെടിവെപ്പിൽ ​കൊല്ലപ്പെട്ട കർഷകരുടെ ബന്ധുക്കളെ സന്ദർശിക്കാൻ പുറപ്പെട്ട കോൺഗ്രസ് ഉപാദ്ധ്യക്ഷൻ രാഹുൽ ഗാന്ധിയെ പൊലീസ് കരുതൽ തടങ്കലിലാക്കി. ഉദയ്​പൂർ വിമാനത്താവളത്തിൽ നിന്ന്​ കാറിൽ യാത്ര ആരംഭിച്ച രാഹുൽ നാടകീയമായി യാത്ര ​ബൈക്കിലേക്കു മാറ്റി. പിന്നീട്​ കാൽനടയായും യാത്ര തുടർന്നെങ്കിലും പൊലീസ്​ തടയുകയായിരുന്നു.

പൊലീസ് ബാരിക്കേഡുകൾ മറികടന്ന് കടക്കാൻ ശ്രമിക്കുന്നതിനിടയിലാണ് രാഹുൽ ഗാന്ധിയെ അറസ്റ്റ് ചെയ്തതെന്ന് പിടിഐ റിപ്പോർട്ട് ചെയ്തു. എന്നാൽ കാരണം കാണിക്കാതെയാണ് തന്നെ അറസ്റ്റ് ചെയ്യുന്നതെന്ന് രാഹുൽ ഗാന്ധി പറഞ്ഞു. നേരത്തെ പൊലീസ് വെടിവെപ്പിൽ അഞ്ച് കർഷകർ കൊല്ലപ്പെട്ട മധ്യപ്രദേശിലെ മന്ദ്​സോറിൽ സന്ദർശിക്കാൻ രാഹുൽ ഗാന്ധിക്ക് പൊലീസ് അനുമതി നിഷേധിച്ചിരുന്നു.

എട്ടു ദിവസമായി മന്ദ്​സോറിൽ പ്രക്ഷോഭം നടക്കുകയാണ്​. പ്രക്ഷോഭ സ്​ഥലത്ത്​ ദ്രുതകർമ്മ ​സേനയെ നിയോഗിച്ചിട്ടുണ്ട്​. ഇന്ത്യൻ കർഷകർക്ക്​​ മേൽ വീണ മരണ ശാപമാണ്​ ബി.ജെ.പിയെന്ന്​ കോൺഗ്രസ്​ വാക്​താവ്​ അഭിഷേക്​ സിങ്​വി പറഞ്ഞു. കർഷക പ്രക്ഷോഭം കോൺഗ്രസ്​ ഹൈജാക്ക്​ ചെയ്യുകയാണെന്ന്​ ബിജെപിയും ആരോപിച്ചു.

കാർഷിക ഉത്​പന്നങ്ങൾ താങ്ങുവില നിശ്​ചയിക്കണമെന്നും കാർഷിക വായ്​പ എഴുതിത്തള്ളണമെന്നും ആവശ്യപ്പെട്ടാണ്​ സമരം നടക്കുന്നത് .സമരക്കാർക്കിടയിലേക്ക്​ നടന്ന ​പൊലീസ്​ വെടി​വെപ്പിൽ അഞ്ചു പേരാണ്​ കൊല്ലപ്പെട്ടത്​.

അതേസമയം, വെടിവെപ്പ്​ പൊലീസ്​ നടത്തിയതു തന്നെയെന്ന്​ മധ്യപ്രദേശ്​ ആഭ്യന്തരമന്ത്രി ഭൂപേന്ദ്ര സിങ് സമ്മതിച്ചു. നേരത്തെ, പൊലീസ്​ വെടിവെപ്പല്ല മരണകാരണമെന്നായിരുന്നു സർക്കാറി​​​​ന്റെ അവകാശവാദം.സമരക്കാർക്ക്​ നേരെ പൊലീസ്​ വെടി​വെച്ച സംഭവത്തിൽ ജില്ലാ കലക്​ടറേയും പൊലീസ്​ സുപ്രണ്ടി​നെയും സ്​ഥലം മാറ്റുകയും ചെയ്​തു.

Read More : പൊട്ടിത്തെറിച്ച് രാഹുല്‍ ഗാന്ധി; ‘വഴി മുടക്കിയ’ പൊലീസുകാരനെ തളളി മാറ്റി

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ