ഹൈദരാബാദ്: ബാഹുബലിയിലൂടെ ജനശ്രദ്ധ നേടിയ തെന്നിന്ത്യന്‍ താരം റാണാ ദഗുപതിയുടെ തിയേറ്റര്‍ കത്തി നശിച്ചു. റാണയുടെ തിയേറ്റര്‍ നവീകരിച്ച് തുറക്കുന്നതിന്റെ തലേ ദിവസമാണ് തിയേറ്റര്‍ തീ പിടിച്ച് കത്തി നശിച്ചത്. ആന്ധ്രയിലെ ചിരലസിറ്റിയിലുള്ള സുരേഷ് മഹല്‍ തിയേറ്ററാണ് കത്തി നശിച്ചത്.

ഒരു കോടിയോളം രൂപയുടെ നഷ്ടം ഉണ്ടായതായാണ് റിപ്പോര്‍ട്ടുകള്‍. വന്‍ തുക മുടക്കി ചിലവഴിച്ച തിയേറ്ററിന്റെ അലങ്കാരത്തിന് പുറമെ 50 ലക്ഷത്തിന്റെ പ്രൊജക്ടറും, പുതുതായി തയ്യാറാക്കിയ 410 സീറ്റുകളുമാണ് കത്തി നശിച്ചത്. എന്നാല്‍ ഒരു കോടി രൂപയുടെ വസ്തുക്കള്‍ രക്ഷപ്പെടുത്താനായതായും അഗ്നിശമന ഉദ്യോഗസ്ഥര്‍ വ്യക്തമാക്കി. എയര്‍ കണ്ടീഷന്‍ സംവിധാനത്തിലെ റിപ്പയറിംഗിനെ തുടര്‍ന്നായിരുന്നു തീപിടിത്തുമുണ്ടായത്.

തിയേറ്ററിന് മുകളില്‍ വന്‍തോതിൽ പുക ഉയരുന്നതിന്റെ ചില വീഡിയോ ദൃശ്യങ്ങള്‍ പുറത്തു വന്നിട്ടുണ്ട്. തേജ സംവിധാനം ചെയ്ത് റാണ നായകനാകുന്ന ‘നേനു രാജാ നേനു മന്ത്രി’ എന്ന ചിത്രം വെള്ളിയാഴ്ച തയേറ്ററില്‍ പ്രദര്‍ശിപ്പിക്കാനിരിക്കുകയായിരുന്നു. നവീകരണത്തിന് ശേഷം റാണയുടെ സിനിമയോടെ തന്നെ പ്രദര്‍ശനം പുനരാരംഭിക്കാനായിരുന്നു ഉദ്ദേശിച്ചിരുന്നത്.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ